Mojokerto — multi.i-news.site,Udan deres sing nyiram wilayah Kecamatan Ngoro, Kabupaten Mojokerto, Kamis awan (9/1/2026), maneh nggawé dalan nasional nang Dusun Ngetrep, Desa Sedati, kecemplung banjir. Panggonan iki pancen wis dadi langganan saben udan deres mudhun.
Saka pantauan nang lapangan, banjir iki disebabno drainase sing ora kuat nampung debit banyu udan. Banyu langsung mbludak mlebu badan dalan nasional sing dadi jalur utama penghubung antarwilayah. Genangan banyune cukup dhuwur lan aruse deres, dadi mbebayani kanggo pengguna dalan, utamane pengendara motor lan mobil cilik.
Banjir mulai katon sekitar jam 13.15 WIB lan anyar mulai surut kurang luwih jam 14.30 WIB. Sak jam luwih, arus lalu lintas nang lokasi dadi alon, malah sempat macet. Akeh kendaraan sing milih mandeg sek, nunggu banyune mudhun ben ora mogok nek maksa nerobos.
Pengendara motor katon akeh sing minggir nang pinggir dalan, dene sopir mobil cilik ragu-ragu liwat mergo banyune wis tekan ngisor lawang mobil. Kahanan iki kerep nggawe kemacetan, soale dalan nasional Ngoro iki jalur vital sing saben dinane rame dilintasi kendaraan pribadi lan angkutan barang.
Kanggo nyegah kecelakaan lan macet luwih parah, anggota Polsek Ngoro langsung mudhun nang lokasi. Polisi ngatur lalu lintas lan menehi imbauan marang pengendara supaya luwih ati-ati lan ora nekat nerobos banjir.
Kapolsek Ngoro nerangno nek banjir iki kalebu banjir luapan sing wis rutin kelakon saben wilayah Ngoro ketiban udan deres. Pihak kepolisian, jarene, tansah siaga kanggo njaga keselamatan para pengguna dalan.
“Banyune cukup deres lan dhuwur. Motor lan mobil cilik rawan mogok. Mula kita atur lalu lintas ben ora ana kecelakaan lan macet sing luwih parah,” ujare.
Sementara kuwi, warga sekitar lan para pengguna dalan yo ngeluh. Miturut dheweke, banjir nang lokasi iki koyoké durung tau entuk penanganan serius. Wis pirang-pirang taun, saben udan deres, dalan iki meh mesthi kebanjiran.
Warga ngarep-arep pemerintah lan instansi terkait gelem serius mbenerno drainase lan ngerapekno sistem aliran banyu. Soale, saliyané ngganggu aktivitas warga, banjir nang jalur nasional iki yo iso ngganggu distribusi logistik lan mbebayani keselamatan wong sing liwat.
Nganti banyu bener-bener surut, petugas kepolisian tetep jaga nang lokasi kanggo mestekno arus lalu lintas bali normal. Kedadean iki maneh dadi pengeling nek masalah banjir nang Kecamatan Ngoro, Mojokerto, isih butuh perhatian lan solusi nyata, ora mung janji tok.
Udan deres ngguyur Ngoro sak awan,
Dalan nasional tergenang banyu.
Kahanan iki dadi perhatian bebarengan,
Mugo-mugo lalu lintas tetep aman lan aktivitas warga lancar saben wektu.
Red/tim
